Niam Vaj Neeb Lis

Kuv zoo siab xyoo 2006 no Vajtswv pom zoo kuv los coj peb cov niam tsev. Kuv ntseeg thiab cia siab hais tias Vajtswv yuav pub lub lajlim tswvyim rau kuv thiab coj kuv txoj hauv kev kom txhua yam dejnum tshwmsim xyoo no ua rau Vajtswv tib leeg tau ntsej muag xwb.

Thov Vajtswv pab kom kuv yuav ua tau raws li Yexus Khetos tau qhia tseg rau Nws cov thwjtim nyob rau hauv Malakaus 9:35.

Lub homphiaj rau peb cov niam tsev xyoo no nyob hauv Yauhas 4:7-14 thiab1 Kaulithaus 12:12-27.

Ua ntej peb yuav kub siab ua Vajtswv tes dejnum, peb yuav tsum muaj kev sibraug zoo nrog Yexus Khetos ua ntej.

1. Peb yuav tsum ua tib yam li tus pojniam ntawm Yauhas 4:7-14. Peb yuav tsum nrhiav txoj kev cawmdim ntawm sab ntsujplig los ntawm cov dej haus tas yuav tsis rov nqhis dua lawm.
2. Cov dej uas yuav txhawv hauv peb lub siab mus ib txhis yog los ntawm peb txoj kev ntseeg thiab cia siab rau Yexus Khetos tib leeg xwb.

Peb yuav tsum paub kom meej hais tias qhov Yexus Khetos los yug ua neeg raug kev tsim txom tuag saum tus ntoo khaub lig lub ntsiab yog li cas tiag. Qhov tseeb yog dab tsi tiag.

Thaum peb paub meej lawm, peb txhua tus vivncaus yuav koom tes los sibpab ua Vajtswv tes dejnum vim peb txhua tus koom tib lub cev. Peb txhuas tus yog Yexus Khetos tej tes tej taw.

Yexus Khetos zoo li lub cev uas muaj tes muaj taw, muaj siab, muaj ntsws. Txawm yog muaj ntau yam los, tej ntawd puavleej koom ib lub cev. (1 Kaulithaus 12:12)

Nej koom Yexus Khetos lub cev. Nej txhua tus puavleej yog Nws tes news taw. (1 Kaulithaus 12:27)

Thaum peb txhua tus paub Vajtswv zoo thiab muaj kev sib raug zoo nrog Nws lawm, peb yuav:

1. Muaj txoj kev ntseeg ruaj khov thiab peb yuav txawj hlub lwm tus tib yam nkaus li Yexus Khetos hlub peb (1 Kaulithaus 13:13)
2. Mloog Vajtswv lus thiab sawv tsees mus ua Vajtswv tes dejnum (Yaxayas 6:8b)

Thov Vajtswv foom koob hmoov rau txhua yam dejnum peb cov vivncaus yuav koom tes ua xyoo no kom huamvam thiab loj hlob rau Vajtswv tib leeg tau ntsej muag xwb.